Weem zeen wae!

Stichting Dialect- en Cultuuronderwijs Limburg (Sjtichting DOL) is ein organisatie die wirkt zónger geldelik gewin en die zich haet toegelag óp óngerwies in de Limburgse sjpraok en kultoer. ’t Is ein sjtichting die gein leje kint, mer waal sjtiepers (geldjsjeters). In hoofzaak wirkt ze zónger subsidies van Gemeindes en/of Provins. Projekte en aktiviteite waere betaald oet de verkuip van Limburgse artikele die de sjtichting meukt. ’t Hingt van gruetdje en doer van ein projek aaf wieväöl miense mitwirke.

In miert 1994 begós Sjtichting DOL offesjeel mit häör werk. Veuraaf ging eine tied van veurbereije door te kalle mit zaakversjtendige in ’t (Limburgs) plat, lierare, de Onderwijs Begeleidings Diensten (noe: Consent, Onderwijsbegeleiding en Innovatie), de Ongerwiesinsjpeksie, Minister van Ongerwies, Jo Ritzen, en anger lüj van zie Ministerie.

Grundlige sjtudie van Het “Kerkrade-Onderzoek” (Stijnen /Vallen, jaore 70 en 80) en gesjprekker mit Dr. Sjef Stijen, ein van de óngerzeukers, waore ’t aanlieje veur ’t óprichte van de Sjtichting.

Häör wiechtigste oetkóms waor dat kinger óptrekke in ’t Limburgs veur ’t óntwikkele van de sjpraok van ’t kindj sjrikkelik good kan zeen.

Op dees oetkomste bazeert Sjtichting DOL häör doele en häör werk.

Al in de jaore fieftig höbbe sjentelikgelierde al gezag det d’r flot get gebeure mós ier ’t Limburgs plat gans versjangeleneerd waas. ’t Innig meugelike waas: óngerwies in eige sjpraok (laes: dialect). “Het is dus vanzelfsprekend dat de kleuter- en basisscholen vanuit het dialect beginnen.” (ref.: Drs. Jo Hansen). Ouch Houben haet dao al ins ierder óp geweze. Hansen haet ouch zien wins oetgespraoke det ’r ’ein Algemein Limburgs’ maog kómme.

’t Sjtraeve van Sjtichting DOL is ’t behaoje en in gebroek haoje van de Limburgse sjpraok en kultoer, en óngerwies in de modersjpraok, naeve ’t Hollesj. Sjtichting DOL geuft dao-euver raod en sjteun binne en boete ’t óngerwies en meukt daoveur lesmaterjaal. Kiekt veur mier in de beukskes: ’óngerwies’, ’sjpraok’, ’projekte’ en ’t vraogheukske’.

Keuninklike Óngersjeijing

Mit de aljaorse lintjesraege woort in 2007 mevrouw Leonie Robroek beloeënd. Veur al häör vriewilligers-aktiviteite, betrókke óp sjpraok en kultoer, en häör ideje, ’t óprichte van de Sjtichting Dialect- en Cultuuronderwijs Limburg en de aktiviteite binne dees organisasie móch Leonie ein Keuninklike Óngersjeijing óntvange.

Bie ’t oetreike, börgervader Toine Gresel, mw. Leonie Robroek (veurzitter) en drs. Leo Henderikx (sikkertaris)

Leonie woort gedekoreerd tot lid in de Orde van Oranje Nassau. Veural ’t initiatief en d’n inzat van de Sjtichting DOL óm ’t Limburgs es minderheidstaal aan te merke haet d’rveur gezörgd dat zie dees Keuninklike Medalie gekrege haet. Bie ’t oetreike woort nog ins nao veur gehaold dat door d’n iever van de Sjtichting DOL “De Raod veur ’t Limburgs” gegrónd waere kós en eine “Streektaalfunctionaris” aangesjteld waere kós. ’t Besjtuur van de Sjtichting DOL dankt ederein dae óp ein positieve wies häör werk al d’n tied gesjtiep haet.