Historiesj verhoal
Zaag, kint ier 't verhoal, joa wit ‘r misjien óch
Van dat beeld ana 't sjtadhoes, boave hoeë in gen lóch.
Ier wit 't nog nete. Och daan mót ‘r ‘ns hure
Wat mich i gen geleensjtroat dizzer daag gebuurde.
't Woar al laat in d'r oavend en gee minsj woar mieë boete.
Hei en doa brank nog leech urgens achter de roete.
‘ne Polies doog zieng rungde, e keek mich ‘ns aan
Als went e wool zage, woa kunste nog vandaan?
D'r wink koam get óp en 't woeëd óch al kouwer.
Ich kroop in mienge jas en ich góng mar get gauwer.
Opins… sjtóng ich sjtil en ich drieënde mich um.
Wat woar dat noe geweë, ich hoeët toch dudelik 'n sjtum.
Ich hoeët ieëmes zuchte, nee doe hoeët ich nieks mieë.
En 't woar toch gee minsj i gen sjtroat mieë te zieë.
Ich keek ‘ns nao boave… joa doe wós ich genóg.
't Woar Sint Pancratius, aan 't sjtadhoes, i gen lóch.
Ich góng óp hem aan en doe hoeët ich hem klage.
Ich hoeët d'r Pancratius gans dudelik zage:
“Ich doog 't zoegeer, ich doog 't ummer mit sjpas.
Mit plezeer heel ich uch hei 't sjtadswape vas.
Mar noe is 't genóg, joa noe is 't gedoa.
Want zoeë kan ich hei neet mieë lang blieve sjtao.
Wat zaan ich sjtoa, nee neet sjtoa, want ich hang
Hei aan 't sjtadhoes wie 'n wrat óp 'n wang.
Mienge ruk is zoeë sjtief, graad als wuur ‘t 'n plank.
Ich han gee geveul mieë in knei en in hank.
Dat wape wat ich vashaw weed zjwoarde als loeëd.
Wen ich hei nog blief hange, 't is besjilis mienge doeëd.
Dan bin ich opnui als martelaar gesjtórve
En han mich ópnui wer d'r Hieëmel verwórve
Ich begin óch te veule zelfs i mienge maag.
Zoeë hoeëg i gen lóch, dat ich dat neet verdraag.
Ich kan 't neet mieë, nee ich weet ginne road.
Geliek lik ich mit wape en al i gen sjtroat.
Doe woar 't wer sjtil, nee noe sjprook e neet mieë.
E houw 'n troan i gen oog, dat kós ich good zieë.
“Och Hillige Pancratius, ich kan 't good begriepe
Dat ier 't doa boave van angs begint te kniepe.
't Is óch neet sjoeën, wat ze mit uch hant gedoa.
Worum hant ze uch neet óppen eëd loate sjtoa.
Mar noa ónge valle, ich geleuf nete, dat dat geet
Ier kunt toch neet zieë of ieëmes ónger uch sjteet.
Noe sjtelt uch ins vuur, ier veelt mit 't ganse gewich
Opins hei noa ónge, ieëmes óp zie gezich.
Dat geuf e sjpektakel en dan nog de res
Ze zouwe nog zage ‘heë doog 't ekspres”.
En Sinte Pancratius wat hauwt ier gedach
Me hauw uch vuur nieks doa zoe hoeëg aangebrach.
Dacht ier dat ‘r gratis in die moer zit gesjoave
Doavuur weëdt noe óch wer belasting gehoave.
Noe zeet toch versjtendig en berus in 't lot
Dat ier doa zoe hoeëg aan die moer hange mót.”
Wie ich dat noe gezag hauw, doe keek heë noa mich
En e mós effe lache mit zie ganse gezich.
“Doe has geliek jóng, ich zal mie lot mar drage.
Joa ich hauwt mich noe sjtil en zal gaar neet mieë klage.
Ich zal in de toekoms graad wie in vreuger dage,
Geduldig 't wape va Heële wer drage.”
Wie e dat hauw gezag, pitsjde heë mich e oog.
Noe woar ich tevreie wie ich dat óch nog zoog.
Ich wunsjde hem ‘ng gouw nach en doe bin ich gegange
Want Pancratius bleef mit plezeer noe doa hange.
En 't sjnachs wen d'r wink jieëgt durch de sjtroate
En Heële liekt sjtil en gans verloate
Dan huurt me 't beeld nog ummer zage
“:Ich bin gruetsj, dat ich 't wape va Heële maag drage.”
